الكورة الشراب – احمد جمعة

فاكرين ايام زمان ?! كان فيها حاجات مميزة يمكن جيلي وكل جيل الثمانينات مر بنفس الحاجات زي مثلا ( مصاصة لومبو ) ولا مثلا (كوتشي اميجو الي بينور) وكان في موضة (الجيلاتي ام عصاية ) وطبعا عمرنا ماننسا اول يوم في الحضانة ولا اول يوم في المدرسة ولا يوم الحقنة في المدرسة ولا لعبة الاستغماية ولا لعبة (كهربا) ولا ( البلي ) ولا (الاتاري) ابو دراعات ولا لعبة جمع الالبوم …و لا جمع صورة العجلة واكسبها وعمري ملاقيت صورة الجدون …يااااااااااااااااااااااااه ذكريات كلها براءة… وحاجات غيرها كتييييييييييير … كانت ايام حلوة اوي ولا مسؤولية ولا التزام ولا شغل ولا اي حاجة ولا كنا نعرف ولا ثورة ولا اعتصام كان اخرنا نغضب ع الاكل ونقوم ومناكلش بس كانت اهالينا بتاكلنا بالعافية .. وكل واحد كان في طفولتة ذكرياتة الخاصة وطبعا بتختلف الذكريات دي من بنت او ولد.. ولاني ذكر فاكيد هافتكر ذكرياتي كولد …انا وبكل بساطة زي كل الولاد في سني والي نشأوا في مناطق شعبية زيي كنا بنستمتع كتير اوي بلعبة >> .. ايوة الكورة الشراب فاكرينها كانت حلوة وممتعة ازاي.. وكنا نجري ونحاول نكسب ونتعارك ونتصالح وحاجات كتير … بس انت فاكرة الكورة الشراب دي كانت بتتعمل ازاي؟!!… كان كل واحد من الشلة بيجيب شراب او اتنين من شراباتة القديمة الي مثلا اتقطعت او الاستك بتاعها باظ ونبدأ نركب الشرابات في بعض بشكل دائري … ومع كثرة عدد الشرابات بتبقي كورة كبيرة وبتجري علي الارض وكل من هب ودب يشوط فيها

 (يعني الكورة الشراب دي عبارة عن مجموعة كبيرة من شرابات اصحابنا المقطعة والقديمة متركبة في بعض ) والفرق بينها وبين الكورة العادية هو ان الكورة الشراب مش بتنط لانها مش فاضية من جوة … والكورة العادية بتنط لانها فيها هواء .. سيبك بأة من الكورة الشراب وتعالي نتكلم عن حالنا دلوقتي … كشباب ونشوف اية الفرق.. تخيل معايا كدة – شاب بيفكر يتجوز مثلا …فيقول لاصحابة انا بفكر اتجوز فيبدأ الاصحاب كل واحد يقولة رأية ..فمثلا تلاقي الي بيقول (ياعم اتنيل) ومنهم الي يقول (يابني الستات مالهمش امان) والي يقول ( عيش حياتك يومين وبعدها اتجوز )… وغيرها كتير من الاراء الي انتوا عارفينها..لحد مايتعقد الولد .. وفي واحد تاني مابيهموش الكلام دة وبيتجوز وبيعيش في تبات ونبات .

– بنت بتفكر تعمل ماجستير فتبدأ تقول لصحباتها ..فتلاقي الردود ( يابنتي روحي اتجوزي احسن ) او الي تقولها ( اشتغلي وجهزي نفسك احسن) والي تقول (وهم الي خدوا ماجستير عملوا اية؟! )…. وغيرها كتير من الاراء الي انتوا عارفينها لحد ماتتعقد البنت .. وفي بنت مبتحطش في دماغها وتروح تعمل الماجستير بتاعها وتتجوز حد كويس وابن حلال. المهم … الشاب او البنت من دول ممكن يتأثر بالكلام السلبي الكتير دة وميمشيش في هدفة او في خطة حياتة كل دة بسبب الكلام الي اصحابة ملوا بية دماغة … وفي شاب او بنت عكس كدة خالص ومبيحطوش في دماغهم كل السلبي دة وبيحققوا اهدافهم. طب تعالي في مثل بأة له علاقة بالوقت الحالي … طبعا انتوا عارفين ان فية انتخابات اليومين دول وكل واحد له حد عايز يرشحة فمثلا .. يكون شاب عايز يرشح ( س ) .. ويروح يقول لاصحابة انا هارشح س ، وطبعا كالعادة تلاقي اصحابة ينهالوا علية بالردود (س) دة فية كذا وفية كذا وفية كذا …. انت المفروض تختار ( ص ) لانة هو الاحسن ..او مثلا يبقي الواحد ماشي في الشارع ويلاقي ناس بتنط في عبة عشان يوقولوا انتخب ( ج ) اصل ( ج ) هو افضل واحد لانة كذا … وكذا .. وكذا…. وغالبا الواحد بيتأثر بالكلام دة وبيتبع توجيهات الناس الي الناس ملوا بية دماغة. طب اية علاقة كل الكلام الي فوق دة بالكورة الشراب .. ركز معايا الكورة الشراب دي زي دماغك بالظبت و كلام الناس السلبي هو الشرابات المقطعة والقديمة الي ملفوفة في بعض ، ومش بس كدة دي ياريتها شراباتك انت بس دي شرابات ناس تانية … الكورة الشراب كل من هب ودب بيشوط فيها ويحركها مكان مايحب لكن في النهاية خليني اسألك سؤال …

ياتري تحب دماغم تكون زي الكورة الشراب وكل من هب ودب بيشوط فيها ويحركها مكان مايحب ؟؟

مع خالص تحياتي

#احمد_جمعة

Share This:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *