طرق وبدايل لزواج آمن

12314407_835828356522622_7982450999236107186_o

الانسان دايما بيكون قدامه اكتر من طريق وغالبا كل طريق بيودي لطريق تاني وفي الاخر كل طريق من دول بيكون ليه نهايه تانيه مختلفه عن كل النهايات التانية،ولكن في الحقيقه الانسان مش بياخد باله من البدايل دي كلها وبيكون عنده اعتقاد ان الطريق ده هو الطريق الوحيد بالرغم من انه اذا بذل شويه مجهود وبص حواليه كتير هيشوف الطرق الي مكانش شايفها ووارد جدا تكون كلها ميسره اكتر من الطريق الي هو فيه.
و السبب الرئيسي في كل الحكايه دي هو ان الانسان مش بيدرس قرارات كويس ولا بيفكر بشكل كامل قبل اختيار اي طريق ولكنه يكتفي بالصوره المبدئيه للطريق اللي ممكن تكون فعلا مضلله ممكن توصل لنهايات ما يقدرش يتحملها.
و الحكايه ديه بتظهر كتير اوي عند اختيار شريك الحياه كتير جدا من الناس سواء كان شباب او بنات اول ما بيوصل لشخص يكون بيحبة ووعد كتير بحاجات كويسه ممكن في لحظه يكون حكم مبدأي صح او غلط عن الشخص ده ويبدا في لحظه يختارة دون عن غيرة ويقبل بيتجوز وتستمر الحياه وبعد فترة يكتشف انه اختار الطريق الغلط وانة عاش جزء من حياته مع شخص مش مناسب .

علشان كده دايما بنصح كل شخص بيفكر في قرار الزواج انه يدرس الموضوع كويس جدا نشوف البدائل كلها المفتوحه والمطروحه ومتستعجلش لان القرار ده هايتبني علىه مستقبل طويل ، و اوعى تتعلق وتتمسك باول طريق ممكن تشوفه لان الطريق ده مش مش مؤكد ان يكون كويس واحتمال يكون لسه في بدائل انت مشفتهاش .
اصبر واستنى و دور كويس حواليك متفكرش فان عمرك بيفوت ولا فان فرصتك في الانجاب هاتقل ولا مستقبلك قرب ينتهي لانك مش ضامن اصلا ولا عارف هتعيش قد اية ولاحياتك هاتبقي ازاي ، وكتير جدا من الناس مجوزتش غير وهي في مرحله الخمسينات و الاربعينات واحيانا اكبر وكانت زيجاتهم ناجحة اكتر بكتير من ناس تانيه اتجوزو في مرحله العشرينات، ده مش معناه ان الزواج غلط في مرحله العشرينات او الثلاثينات ، ولكن انا اقصد ان الصبر دايما يخليك تشوف وتقيم الامور بشكل اكمل ودة انت محتاجه في قرار مهم زي الجواز وتكوين اسرة.

المشكله كلها ان الشاب او الفتاه ويكون عنده نظره غير ناضجه في الحكم على الطرف التانى والزواج و الاعلام و كلام الناس كتير بيأثر في نقطه زي دي، الاعلام مثلا في السنوات الاخيره وجه للشباب صوره كاذبه تماما وعارية من الصحة عن الزواج ودة خلي كل شاب وفتاه يحلم انه يتجوز زي اللي في الفيلم و المسلسل يعني بيقول كلام حلو كتير وبيجيب هدايا كل ويرسم له قلوب على السرير بالورد و….حاجات من هذا النوع كثير هتكون تقريبا كلها بعيده عن الواقع العملي الحقيقي ،وان كانت موجوده فهاتكون مش بنفس الصوره اللي اتخيلها الشخص قبل ما يخوض التجربة بنفسة، وللاسف بتكون الصدمة كبيرة بين الواقع الحقيقي مع امنياتي المغلوطة قناعاتي الخاطئه.

وكتير جدا من الشباب اول ما بياخد قرار الجواز بيفكر في الي بيحبه من وسط الاختيارات المتوفرة ولكن في الحقيقه لو كان الجواز مبني على الحب وبس بيحصل من وراه كوارث كتير جدا ، والسبب زي مابيقولوا طول ما الانسان بيحب مبيشوفش عيوب الي بيحبه ويغطى كتير جدا على العيوب، ولكن في الحقيقه بعد فتره من الجواز ينطفي الحب وبريقه ينطفي وتبدا تظهر عيوب الشخص اللي مكانتش موجوده قبل كده بالنسبه له ،لكنها فالحقيقه كانت موجوده بس هو اللي مكانش شايفها وكان اعمى عنها بسبب الحب.

وفي ناس تانيه لما بتفكر تتجوز دايما بتدور على الشخص اللي شبهها وفي الحقيقه دول بيلاقو نفسهم في ازمه كبيره جدا ، مثلا لو كنت شخص سلبي او كئيب او مش جرئ او مش بتاخد خطوات جاده في حياتك .. المصيبه هنا كبيرة لو اخترت حد شبهك فيه نفس العيوب دي هتبقى اسرة هذيلة وضعيفه جدا جدا و لا هتاخو عمركو خطوات جديه تأثر في مستقبلكو ومستقبل اولادكم، وكمان في بعض الطباع صعب جدا تبقى موجوده في الزوجين مع بعض زي مثلا لو زوجه كانت عنيده والزوج كمان عنيد وحصلت بينهم مشكله بكل تاكيد المشكله دي هتكبر وهتبقى ملهاش حلول سهله او مثلا طبع الكدب او قلةالصبر .. كلها طباع لو اشترك فيها الزوجين وارد جدا تهد الاسره.

من الاخر اهم نصيحه
متدورش على اللي شبهك؛ دور على الي يكملك!
متدورش على اللي بتحب وبس؛ دور على اللى تقبلوا ويكون بينكم تكافؤ !
وكدة تبقي اسعد انسان ان شاء الله

#احمد_جمعة
للمزيد : www.MrAhmedGomaa.com

لطفا ان اعجبك المقال ادعمنا Share ولا تبخل بتعليقاتك المفيدة والنقاش

Share This:

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *