ازاي تضمن رزقك؟

ازاي تضمن رزقك؟

ممكن السؤال يكون مثير للجدل الي حد ما، لكن خليني اوضحلك قصة:
من حوالي 7 سنين كدة كنا عملنا اعلان في جريدة الوسيط عن واحد من كورسات مؤسسة ابني نفسك للتنمية، وسبحان الله الاعلان دة مجاش من وراه ولا عميل بالرغم من انه الاعلان دة فضل شهر كامل من غير اي جدوي نهائياً، والكورس اتنفذ وجالة عملاء باعلانات اخرى الا الاعلان دة.
المهم ان بعد حوالي 4 سنين او اكتر ومكانتش المؤسسة عاملة اعلانات وقتها تقريبا، لاقينا واحد دخل المؤسسة معاه قصقوصة من الجرنال فيها الاعلان نفسة الي كان وقتها مجابش اي نتيجة ، وطالب يشارك في نفس الكورس الي فالاعلان وبيقول انه كان السعر عالي علي امكانياته وقتها وقعد الفترة دي يظبت امورة لحد ماكون المبلغ ورتب مواعيد شغله وجة ياخد الكورس، فالاستاذه دعاء مسئولة خدمة العملاء وقتها بلغته ان الكورس دلوقتي سعرة اتضاعف اكتر من 3 مرات خلال الفترة دي، فالراجل دة قرر انه يشارك في الكورس بالسعر الجديد.
 
فالحقيقة بعد فترة كدة قعد اتدبر في الموقف الي حصل واكتشفت ان المبلغ الي اتدفع تقريبا بيساوي فترة الانتظار والصبر مع الاستمرار في السعي وبالتالي جات النتيجة كاملة مع اضافة قيمة الصبر كله كما لو كأني مثلا استثمرت قيمة الكورس من 4 سنين لحد وقت ماحجز بالسعر الجديد وكسبت وبزيادة كمان الحمد لله.
 
شوف ببساطة ربنا سبحانة وتعالى قال في سورة النجم (وأنْ ليس للإنسان إلا ماسعى وأن سعيه سوف يُرى* ثم يُجزاه الجزاء الأوفى* وأن إلى ربك المنتهى) ، يعني انت عليك السعي وعلي الله النتيجة وبزيادة لان ربنا اكرم الاكرمين.
 
انت عارف المشكلة الحقيقية فين؟
دايما المشكلة بتكون في الاستعجال وعدم الصبر علي نتيجة السعي، ف مثلا عايز تشتغل وتبقي غني بسرعة ، عايز تلعب رياضة وتعمل عضلات بسرعه، عايز تزاكر قليل وتنجح بتفوق، عايز تتكاسل عن عملك وتحصل علي ترقية.. وغيرها كتير فالحقيقة النتايج مبتجيش بالطريقة المستعجلة دي، ودة في حد ذاتة حكمة كبيرة من ربنا انه عايز يعلم بني ادم ان الرزق جي جي بس في وقتة ومكانة المناسب ليك يابني ادم ، انت بس مطلوب منك السعي والاستمرار فية، مع اليقين التام في عطاء ربنا ليك، هاتلاقي كل حاجة جات صح في الوقت الصح والمكان الصح.
وهو دة الي يخليك تضمن رزقك بإذن الله 🙂
 
#اجتهد_تجد
المدرب #احمد_جمعة
 

Share This:

اكتب تعليقُا

لن يتم نشر عنوان بريدك الإلكتروني. الحقول الإلزامية مشار إليها بـ *