ازاي تقتل نفسك من غير ماتتعور ؟!

ازاي تقتل نفسك من غير ماتتعور؟!
تخيل معايا كده لو في يوم عيد ميلادك جالك هديه عباره عن بوكس كبير مقفول ولما جيت تفتح البوكس لاقيت جواه قطه وانت من الناس الي عندهم فوبيا من القطط، في اللحظة دي من رعبك من القطه بسرعه قفلت البوكس تاني وجبت بكرة لزق وقعدت تلزق في البوكس عشان القطه الي بترعبك ماتطلعش منه.. وحطيت البوكس في مكان لمده شهر وقررت انك ترجع تفتحة تاني؛ تفتكر هاتلاقي ايه؟!
اكيد طبعا هاتلاقي القطه ماتت وتحللت وبقت حاجه مؤذيه جداً سواء بشكلها او ريحتها وممكن تفضل مسببالك تعب نفسي بعد التجربه دي وممكن تفضل قرفان من المنظر او حاسس بالذنب انك قتلتها … وكل دول اوحش من خوفك من القطه نفسها.

اهي القطة دي بالظبت زي مشاعرك السلبيه الزياده الي انت مش عايزها، ولكنك قررت تكتمها جواك لحد ماتعبتك اكتر.
وعشان كدا كتير بنسمع عن حد جاله مرض او مات بسبب حزن شديد علي فقد شخص عزيز عليه، وفعلا كلنا دلوقتي بقينا عارفين ان كتير من الامراض سببها بدأ بمشكله او ضغط نفسي .

النهارده كنت بقدم محاضره بعنوان اداره المشاعر والانفعالات ولفت انتباهي جداً وجود اكتر من 15 فرد في المحاضره بيشتكو من مشكلات محدده في انفعالهم زي القلق والغضب والصدمات الي سببها حجات في العلاقات او الشغل وغيره، ودايما لما بتتبع المشكلات دي بكتشف انا والعميل انها كانت بدأت بحجات بسيطه وتفاهه يعني مثلا:
واحد في يوم اتدلق عليه نقطه شاي سخنه ولسعت ايده ف اتضايق شويه وفي نفس الوقت وهو متضايق من لسعه الشاي مراته دخلت عليه طلب منة مصاريف لتمرين الاولاد فاتحول من مضايقه لعصبيه وبعد شويه اتحولت لعركة بينة وبين مراته وبعد العركة راح شغله وهناك لانه اصلا اعصابه مشدوده اتعارك مع مديره في الشغل ولما اتعارك مع مديره خد خصم 3 ايام من المرتب … والغضب بيزيد.. وهو راجع من الشغل اتعارك مع سواق التاكسي عشان خد طريق غير الي هو عايزه ولما اتعارك معاه بكتلة الغضب الي بتزيد معاه من الصبح وصلت المشكله لانهم راحو قسم الشرطه … و… و .. وفضل الغضب يزيد ويجيب غضب اكبر واكبر واكبر وخلصت سلسله الغضب دي بعد كم يوم
لحد اخر الشهر والراجل كان خلاص هدي ونسي المشكلات ومبقاش غضبان وصالح بتاع التاكسي وكله تمام، ورايح اخينا ده يقبض مرتبه لاقاه ناقص اجر 3 ايام الخصم الي كان خصمهاله المدير بسبب المشكله الي في اول الشهر.. وفي اللحظه دي رجع نفس الشعور جواه وبقي غضبان تاني وبدأت رحلة غضب جديده من اللحظة.
الشخص ده نموزج لينا كلنا في مشاعر مختلفه ومواقف مختلفه بنمر بيها تقريبا كل يوم.

انت كده فهمت انا اقصد ايه!
المشاعر بتاعتك (ايجابيه/سلبيه) بتبدأ بحاجه بسيطه جداً ولكن بتزيد وتضاعف نفسها اكتر واكتر وممكن تحول حياتك كلها لجحيم لو فضلت مركز معاها … وده الي ممكن حرفياً يموتك ويجيبلك امراض لا حصر لها ولا عدد .

طب المفروض اعمل ايه يامستر احمد عشان ادير واتحكم في انفعلاتي؟!
حلو السؤال وانا احبك وانت عايز تتعلم كده🤙
اخليني ارجع بيك تاني للقطه الي كلمتك عنها في الاول، لو كنت اول مافتحت البوكس سيبتها تجري وتطلع بره البيت كنت رحمت نفسك من الي حصل بعد كده من زعل وقرف ولوم ذات.
وبكده يبقي خطوتك الاولي ببساطه انت عليك تسريب مشاعرك الزياده الي مش عايزها وتطلعها براك عشان ماتتحدش مع غيرها وتضاعف نفسها ضدك، وتسريبها ده من خلال اي هوايه او نشاط بتفرغ فيه المشاعر دي وطبعا اقصد هنا الانشطه المفيده زي الرياضه والرسم مثلا ، لكن اياك تسرب مشاعرك في حاجه تضرك زي التدخين او الاكل لان الحجات دي هاتوديك في مشكله اكبر من مشكله المشاعر نفسها.

ودلوقتي الخطوة التانيه غير صُحبتك الي بتدعم المشاعر السلبيه زي الحزن والقلق، ودي بحب اطبق فيها الطريقة دي: مثلا عندك 10 صحاب منهم مجموعه كل ماتقعد معاهم بيتكلمو عن نكد ومجموعة تانيه دايما متفائلة فانت عليك توزع80‎% ‎ من جهدك لعلاقاتك مع الناس الاسوياء نفسيا يعني لو بتقابلهم مرتين في الشهر خليهم 10 والباقيين الي بيدعمو مشاعرك السلبيه اديهم20‎%‎ بس من جهدك، يعني لو بتقابلهم 10 مرات في الاسبوع خليهم مرتين بس،
وبكده هاتبقي بتحجم مشاعرك السلبيه وبتوقف نموها وبتبدلها بالايجابيه وبتزودها . والطريقه دي من تطبيقات قاعده 20/80 الي عملها الايطالي باريتو واتكلم عنها ريتشارد كوخ في كتابه الي بنفس الاسم

اما خطوتك التالته فهاتكون اوزن مشاعرك ، ودي طريقه كنت اتعملتها من حلقة لطبيب نفسي في برنامج في التليفزيون امريكي كنت شوفته من فتره، والطريقه ببساطه بتقول:
اعمل قايمة فيها فيها عمودين الاول اسباب مشاعرك السلبيه والثاني رد الفعل والاستجابه والقايمة تكون مقسمة ل10 درجات بحيث 1 اقل درجة و10 اعلاها، مثلا لو خدت الغضب كنموذج هاتعمل قائمة باسباب الغضب مترتبه من 1 ل 10 مثلا 1 ان حد يخبطة وانت ماشي و2 ان موبايلك يهنج و3 حد يتأخر عليك .. وتفضل تزود لحد ماتوصل ل10 الي هاتكتب فيها اكتر شئ يسببلك اعلي درجات وليك شخص يسخر منك.
وبعدين هاتعمل القايمة التانيه بتاعه ردود الفعل والاستجابه وعلي سبيل المثال درجة 1 هاتكون بتستغفر ربنا فيها اما الدرجة 2 بتعلي صوتك شويه ودرجه 3 بترزع الحاجه الي في ايدك وتفضل تزود في ردود الفعل تصاعدياً لحد الدرجة 10 بيكون فيها اكبر حاجه ممكن تعملها وليكن تضرب الشخص الي مزعلك مثلا .
وبكده بقيت جاهز لو جالك غضب اسئل نفسك سببه من الدرجة كام ولو مثلا طلع من الدرجة 1 هاتديله رد فعل من الدرجة 1 وهكذا..

ولكن طبعا الطريقه دي محتاجه دايما لحظه وعي وقت التعرض للانفعال وده مش سهل وعشان توصلة محتاج تعمل شويه حجات زي مثلا اتنفس ببطء وغير وضعيه جسمك عشان تكسر طيف المشاعر جواك وتدي لعقلك فرصه انه يفكر بالطرق الي فاتت.

وماتنساش طبعا تزور الطبيب او الاخصائي النفسي او Life Coach لو اي مشاعر زادت عندك وبدأت تأثر بشكل سلبي علي حياتك لدرجة انت عجزت عن التصرف معاها.

خليني افكرك بان #حياتكاختياراتكفاختر_ماشئت وانك هاتتسئل قدام ربنا عن عمرك وصحتك استهلكتهم في ايه.

كل الود
المدرب #احمد_جمعة
www.mrAhmedGomaa.com

Share This:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *